Döðlugott hef ég rekist á í nokkrum útgáfum. Uppskriftina sem ég styðst við fékk ég á sínum tíma hjá Sonju starfssystur minni í HA en hef breytt henni aðeins, þ.e. minnkað bæði smjör og sykurmagn en aukið döðlumagnið. Í sjálfu sér er döðlugott ekki endilega jólanammi og sómir sér vel í veislum allt árið. Þetta er mjög fljótlegt og einfalt og meira að segja þeir sem ekki segjast hrifnir af döðlum gúffa gottið í sig. Ég nota ferskar döðlur, finnst þær einfaldlega betri. Ég hef prófað að setja piparfylltar lakkrísreimar (150-250 g) saman við „deigið“ og það var býsna gott. Reimarnar eru þá skornar í litla búta og settar út í áður en rice crispies fer saman við. En hér er hefðbundna útgáfan.
Innihald:
270 g smjör (var 350 g)
90 g hrásykur (var 150 g)
400 g ferskar steinlausar döðlur (var 350 g)
250 g (ca. 2 lítrar) rice crispies
400-500 gr dökkt súkkulaði (t.d. Síríus suðusúkkulaði)
Smjör og sykur sett saman í stóran pott og látið bráðna/malla. Ég nota stóran pott svo ég geti blandað öllu saman í honum og sparað uppvaskið.
Næst er að steinhreinsa döðlur og hakka/saxa þær gróft. Ég vigta döðlurnar eftir að ég er búin að steinhreinsa.
Hökkuðum döðlum er svo bætt út í pottinn og „bræddar“ saman við.
Gott er að hræra í öðru hverju og passa að þetta brenni ekki. Slökkt undir potti og látið kólna aðeins. Þetta verður að karamellulíkum massa.
Rice crispies er síðan sett útí og allt hrært vel saman.
Ofnskúffa klædd með bökunarpappír og hellt úr pottinum í skúffuna. Dreift úr massanum og þjappað mjög vel. Kælt í ísskáp í u.þ.b. klukkutíma.
Súkkulaðið brætt yfir vatnsbaði og hellt ofan á. Dreift sem jafnast, hér þarf að hafa hraðar hendur áður en súkkulaðið byrjar að harðna.
Látið kólna og síðan skorið í hæfilega bita, stærðin er smekksatriði en mér finnst ágætt að hafa þá ekki mjög stóra. Ágætt að geyma bitana í kökubauk og setja bökunarpappír á milli laga. Geymist best á köldum stað.
Stína stússar 