Nýlega kom Þóra kollegi minn norður í framboðsferð og hélt fundi með iðjuþjálfum hér á svæðinu. Hún hafði keypt meðlæti í Costco til að bjóða upp á með kaffinu á vinnustaðafundum. Þegar hún setti á borðið skál með saltkringlubitum, sem mig minnir að heiti Snappers, varaði hún viðstadda við afleiðingunum því þetta væri verulega ávanabindandi stöff. Skemmst er frá því að segja að bitarnir reyndust verulega ljúffengir. Þar sem Costco er ekki beint hverfisbúð hér í höfuðstað Norðurlands ákvað ég að athuga hvort ég gæti ekki bara gert svona sjálf. Leit á internetinu leiddi í ljós að ég var ekki sú fyrsta sem reyndi að búa þetta gúmmelaði til í eldhúsinu heima. Framkvæmdin virtist einföld og ég ákvað að prófa og setti saman mína útgáfu. Þess má geta að ég fór með þessa frumraun í vinnuna og þar virtust sumir ánetjast strax.
Innihaldsefni:
- 300 g 56% súkkulaði frá Nóa (eða dökkt súkkulaði að eigin vali)
- Saltkringlur – ca 80-100 g
- 170 g ljósar karamellur
- 2 msk rjómi
- 100 g suðusúkkulaði
Aðferð:
- Bökunarplata klædd með bökunarpappír
- 300 g súkkulaði brætt í skál yfir vatnsbaði
- Karamellur og rjómi brætt saman í potti.
- Súkkulaðibráðinni smurt á bökunarpappírinn.
- Saltkringlum raðað þétt á súkkulaðið og þrýst ofan á svo þær festist.
- Karamellubráð hellt yfir, helst þannig að hún dreifist nokkuð jafnt yfir.
- Platan með öllu gumsinu sett í frysti í ca 5 mínútur.
- Á meðan eru 100 g af suðusúkkulaði brædd yfir vatnsbaði.
- Platan tekin úr frysti og súkkulaðið látið leka í mjóum taumi yfir herlegheitin.
- Platan sett aftur í frysti og allt látið harðna vel – tekur ekki nema svona 5-10 mínútur.
- Platan tekin úr frysti og skorin í bita sem settir eru í box. Ég setti bökunarpappír á milli laga í boxið svo bitarnir klesstust ekki saman.
- Geymt í kæli.
Stína stússar 