Stína stússar

Þrumari eða seytt rúgbrauð er bakað við lágan hita í langan tíma. Þeir sem hafa aðgang að eigin hver til að baka brauð eru líklega ekki margir en flestir hafa bakaraofn sem dugar ágætlega til verksins. Rúgbrauðsbakstur er einfaldur, eina sem þarf að gera er að sulla saman deiginu, pota því í tómar mjólkurfernur og baka við lágan hita í 10-14 tíma. Ég geri þetta á kvöldin og læt brauðið bakast yfir nótt.

750 g rúgmjöl
400 g heilhveiti
1 ½ l súrmjólk
4-5 tsk natron
2-3 tsk salt
250 g síróp

Aðferð
Þurrefnum er blandað saman í stórri skál, súrmjólk og sírópi bætt í og hrært. Þetta er hægt að gera í hrærivél ef skálin er þokkalega stór. Deigið er  sett í fjórar lítra fernur og passað að fylla bara til hálfs. Þá er lokað fyrir (t.d. með þvottaklemmum) og bakað við 90-100°C í 10-12 tíma við blástur.  Ef ekki er notaður blástur: 100°C í  minnst 10 tíma.  Þetta með tímalengdina er ekki alveg nákvæmt og skiptir kannski ekki öllu máli. Í þetta skipti bakaði ég brauðin við 90°C í 12 tíma. Annars las ég í gamalli blaðagrein á netinu (sjá hér) að ef bakað væri við lágan hita nægilega lengi væri hægt að sleppa sírópi og öðrum sætuefnum. Næst ætla ég að prófa það og athuga hvort rétt reynist. Brauðunum má svo skipta í hæfilega skammta og frysta.