Fyrir allmörgum árum fengum við súpergóðan spínatpastarétt hjá vinum okkar þeim Önnu Siggu og Gylfa. Síðan höfum við eldað þennan rétt reglulega og uppskriftin kannski breyst aðeins í okkar meðförum en grunnurinn er sá sami. Undanfarið höfum við skipt pastanu út fyrir eggaldin og finnst það hreint ekki síðra. Hér kemur lýsing á eggaldin-útgáfunni en vegna þess að ég hef fengið eindregnar óskir um að birta uppskrift að pastaútgáfunni fléttast inn í hvernig sú útgáfa er, enda er þetta í grunninn sama uppskriftin.
Við byrjum á sósunni en í hana fer:
1 msk góð olía
2 laukar, saxaðir frekar smátt
2 hvítlauksrif, pressuð eða söxuð
2 litlar eða ein stór dós tómatpúrra/kraftur (ca. 70 g)
2 dósir niðursoðnir tómatar
2 tsk þurrkuð basilíka eða slatti af ferskri
1-1,5 tsk sjávarsalt
1 tsk nýmalaður svartur pipar
Olían er hituð aðeins í potti og lauk og hvítlauk bætt út í. Látið krauma í nokkrar mínútur þangað til laukurinn er orðinn glær. Hér þarf bara að passa að laukurinn brenni ekki.
Næst er tómatkrafti, tómötum og kryddi bætt í og sósan látin malla, undir loki, við fremur lágan hita í a.m.k. 30 mínútur en gjarnan lengur ef tími er til þess.
Næsta verkefni er að græja eggaldin. Þau eru bökuð í ofni og nú er sniðugt að kveikja á honum og stilla á 200°C. Við þurfum allavega 700 g af eggaldinum. Þau eru skoluð og snyrtur af þeim blaðendinn. Síðan eru þau sneidd, á langveginn, í u.þ.b. sentimetra þykkar sneiðar. Sneiðarnar eru svo lagðar í pappírsklædda ofnskúffu og smurðar létt með olíu á báðum hliðum. Eggaldinin draga í sig töluverða olíu ef þau komast upp með það og því þarf að passa að fara sparlega með olíuna, þetta á ekki að verða gegnsósa. Ofnskúffan er sett í heitan ofninn og eggaldinin bökuð í 10-12 mínútur á hvorri hlið. Eftir 10 mínútur þarf sem sagt að taka skúffuna út og snúa sneiðunum.
Pastaútgáfan: Sjóðið u.þ.b. 300 g af pasta, gjarnan fiðrildapasta (farfalle). Sjóðið ekki alveg eins lengi eins og segir á pakkanum því rétturinn á eftir að fara í ofn og ef pastað er fullsoðið áður en það fer í ofninn verður það óþarflega klessulegt í lokin. Skolið pastað í köldu vatni þegar suðunni lýkur.
Nú er komið að spínatinu. Magnið fer svolítið eftir smekk en ágætt er að miða við 350-500 g af frosnu spínati sem búið er að láta þiðna. Við byrjum á að hita 1-2 msk af olíu á pönnu og rífum útí tæplega hálfa múskathnetu. Hér mæli ég eindregið með að freistast ekki til að nota rifið múskat úr krukku, múskathnetan gefur mun meira og betra bragð.
Múskatinu er blandað vel saman við olíuna. Kreistið svo sem best af vökva úr spínatinu og bætið því á pönnuna ásamt u.þ.b. 100 g af hreinum rjómaosti. Hrært rólega og af þolinmæði þar til rjómaosturinn hefur bráðnað og allt blandast vel.
Loks er kryddað með sjávarsalti og nýmöluðum svörtum pipar eftir smekk. Ágætt að byrja á svona hálfri teskeið af hvoru.
Nú erum við komin með tómatsósu, spínatjafning og bakaðar eggaldinsneiðar (eða soðið pasta) og getum farið að raða þessu saman í ofnfast fat.
Eggaldinútgáfan: Fyrst er sett smávegis af sósu í botninn, þá eitt lag af eggaldinsneiðum, allur spínatjafningurinn, meiri sósa, annað lag af eggaldinum, aftur sósa og loks rifinn mozzarellaostur eða sneiddur ferskur. Við vorum með sneiddan ferskan í þetta sinn. Ef afgangur verður af sósunni (sem er líklegt því uppskriftin er frekar rausnarleg) má geyma hann í ísskáp og nota í annað einhvern næstu daga eða frysta og nota síðar.
Spínatútgáfan: Ofnfasta fatið er smurt aðeins með olíu. Síðan er helmingurinn af pastanu settur í botninn, þá allur spínatjafningurinn, svo hinn helmingurinn af pastanu og loks sósan. Ekki er víst að nauðsynlegt sé að nota alla sósuna, þetta er býsna ríflegt magn. Afganginn má nýta í allt mögulegt næstu daga eða frysta og nota síðar. Efst er svo settur rifinn mozzarellaostur eða ferskur, sneiddur.
Sett í 200°C heitan ofn og bakað þar til osturinn er aðeins farinn að taka lit. Það tekur svona 20-30 mínútur. Borið fram með grænu salati ef vill, annars er þetta stútfullt af grænmeti, allavega eggaldinútgáfan.
Stína stússar 